Waxaa maanta munaasabad ka dhacday Wasaarada Qorsheynta iyo Xiriirka Caalamiga ah xilka si rasmi ah loogu wareejiyey Wasiirka Cusub ee Wasaaradaasi Daa’uud Maxamed Cumar, xafladan ayaa waxaa kasoo qeyb galay Madaxweynaha Puntland Dr.Cabdiraxmaan Maxamed Faroole.

Xafladan oo saaka ka dhacday Xarunta Wasaarada Qorsheynta iyo Xiriirka Caalamiga ah ayaa waxaa sidoo kale ku sugneyd Wasiir kuxigeenka xilka wareejineysay Wasaarada Qorsheynta Marwo Saynab Ugaas Yassin, hase yeeshee waxaa madasha ka maqnaa Wasiirkii xilka Wareejin lahaa ee Qorsheynta iyo Xiriirka Caalamiga Faarax Aadan Dhalac.

Munaasabadan waxaa warbixin ka jeediyey Kusiimaha Agaasimaha Wasaarada Maxamed Cali Ismaaciil oo ka hadlay waxqabadka wasaarada asagoo markaasi dhamaan warbixintii Wasaarada iyo hantideeda qoraal ah u dhiibay Madaxweynaha Puntland Dr.Faroole oo halkaasi ku sugnaa.

Waxaa ayaduna halkaasi xilka ku wareejisay Marwo Saynab Ugaas Yaasiin, oo horey u ahaan jirtay Wasiir kuxigeenka Wasaarada Qorsheynta iyo Xiriirka Caalamiga ah, ayadoo maanta xilkaasi wareejisay.

Madaxweynaha Puntland Cabdiraxmaan Faroole oo madashaasi ka hadlay ayaa u mahadnaqay mas’uuliyiinta Wasaarada ee horey hawsha usoo waday asagoo markaasina kala dar daarmay xubnaha cusub ee xilka loo magacaabay in ay hawshooda si haboon u gutaan.

Wasiirka cusub ee Wasaarada Qorsheynta Xiriirka Caalamiga Daa’uud Maxamed Cumar oo halkaasi ka hadlay ayaa u mahadnaqay xubnihii ka horeeyey asagoo sheegay inuu ku dadaali doono in wax badan ka qabto Wasaarada oo kamid ah Wasaaradaha ugu muhiimsan ee Xukuumada Puntland.

Dhanka kale Wasiirkii hore ee Wasaarada Qorsheynta iyo Xiriirka Caalamiga Faarax Aadan Dhalac ayaa maanta diiday inuu kasoo qeyb galo Xafladii xil wareejinta, sida ay Horseed Media u sheegeen xubno kamid ah Wasaarada, waxayna intaasi ku dareen in Wasiirka uusan maanta keenin gaarigii Wasaarada lahayd oo kamid ahayd hantidii wasaarada ee la wareejin lahaa.

Kadib kulankan Xilwareejinta ah ayaa la sheegay in Wasiirkii hore Farax Dhalac  ay gurigiisa gaareen ciidamada amniga kuwaasi oo u kaxeeyey Mr.Dhalac Saldhiga Garowe, halkaasi oo laga soo siidayay kadib markii ay damiinteen odayaal dhaqameed. Illaa iyo hada arrintan xariga Wasiirkii hore macada inay salka ku heyso Arrinta la xariirta Gaarigii Wasiirka ee maqan oo aan illaa iyo hada la aqoon meeshuu ku danbeeyey, gaarigaasi ayaa ah mid Qaramada Midoobay ugu deeqday wasaarada iyo diidmadiisa ka qeyb gelida Munaasabada xilwareejinta. Xukuumada Puntland ayaa ka gaabsatay inay wax war rasmi ah xiligan kasoo saarto arrinta ku aadan Wasiirkii hore ee Faarax Aadan Dhalac.

Inta badan Shaqaalaha Wasaarada Qorsheynta iyo Xiriirka Caalamiga ah ayaa maanta kasoo xaadiray munaasabadii xil Wareejinta oo uu ka qeyb galay Madaxweynaha Puntland iyo mas’uuliyiin kale oo badan.

C/risaaq Shiino